ပြည်တွင်းကုန်သွယ်မှုသတင်း

       ဧရာဝတီတိုင်းဒေသကြီးအတွင်း ပြည်တွင်း၊ ပြည်ပဈေးကွက် ဝယ်လိုအားရှိသော ငါးရှဉ့် များကို ပြည်ပသို့ နှစ်ပတ်လည်တင်ပို့ရောင်းချမှုရှိသော်လည်း ပွင့်လင်းရာသီထက် ယခုလို မိုးတွင်းတွင် ငါးရှဉ့်များကို ပိုမိုဝင်ရောက်လျက်ရှိကြောင်း ဈေးကွက်မှသိရသည်၊၊

    ငါးရှဉ့်မျိုးများကို ထိန်းသိမ်းရန် ငါးလုပ်ငန်းဦးစီးဌာနမှ (၅)စင်တီမီတာ လုံးပတ် အထက်သာ ဖမ်းဆီးတင်ပို့ရောင်းချခွင့်ပြုပြီး ဇွန်လမှ နိုဝင်ဘာလအထိ ဈေးကွက်မှတင်ပို့မှုများ၍ ဒီဇင်ဘာလ နောက်ပိုင်းငါးရှဉ့်အဝင်နည်းသွားကြောင်း ပုသိမ်ဈေးကွက်မှပြည်ပတင်ပို့သော ငါးရှဉ့်များမှာ ပါးနီ၊ ပါးမွှား(၂)မျိုးသာ Export ဈေးကွက်သို့တင်ပို့လျက်ရှိပြီး ငါးရှဉ့်တွင် ကျန်းမာရေးအတွက် ပရိုတင်း ကြွယ်ဝလျက် အာရုံကြောကောင်းမွန်၍ သတ္တုဓာတ်နှင့် ဗီတာမင် တွေလည်း ပါဝင်ပြီး သံဓာတ်များ လည်းပါဝင်ကြောင်း သံဓာတ်လုံလောက်မှုမရှိရင် ခန္ဓာကိုယ်ထဲမှာ သွေးနီဥနည်းပါး၍ ခေါင်းမူး ခေါင်းကိုက်အားနည်းတာတွေဖြစ်နိုင်ကြောင်း ၎င်းအပြင်နွားနို့၊ ဒိန်ချဉ်တို့လို အရိုးကိုသန်မာစေသော Phoshorus ဓာတ်များပါဝင်ပြီး သွေးအာကောင်း၍ သွေးအား ကောင်း၍ ငါးရှဉ့်ကို ပြည်တွင်း စားသောက်ဆိုင်များနှင့်ဟိုတယ်စာအဖြစ် စားသုံးလျက်ရှိကြောင်း ဈေးကွက်မှ သိရသည်၊၊

          ပုသိမ်မြို့ပေါ်အဝယ်ဒိုင်သို့ ပုသိမ်မြို့နယ်၊ သာပေါင်းမြို့နယ်၊ ငပုတောမြို့နယ်များရှိ ကျေးရွာ များမှ အဝယ်ဒိုင်သို အဓိကလာရောက်ရောင်းချလျက်ရှိပြီး အကောင်အကြီး၊ အသေးပေါ် မူတည်၍ (၁)ပိဿာလျှင် ၁၂၀၀ဝိ/- ၁၆၀၀ဝိ/- ဈေးဖြင့် ဝယ်ယူလျက်ဝယ်ယူထားသော ငါးရှဉ့် များကို ရေနှစ်ထပ်၊ သုံးထပ်လဲလှယ်၍ ငါးရှဉ့်အသေးများကို ဖယ်ပြီးဖော့ပုံး၊ ပလပ်စတစ်ပုံး များတွင် ၂၀/၂၅ပိဿာ ထည့်သွင်း၍ ရန်ကုန်မြို့ရှိစံပြဈေး၊ လှိုင်သာယာဈေးနှင့် အင်းစိန်မြို့နယ် ကြို့ကုန်း ငါးရှဉ့်အဝယ်ဒိုင်ကြီးများသို့ တင်ပို့လျက် ရန်ကုန်မှတဆင့် ပြည်ပနိုင်ငံများသို့ တင်ပို့ ရောင်းချလျက်ရှိကြောင်း ပုသိမ်မြို့ငါးရှဉ့်လုပ်ငန်းရှင်များထံမှ သိရသည်၊၊

 DOCA (ဧရာဝတီ)

        ဧရာဝတီတိုင်းဒေသကြီးသည် ဆန်စပါးအများဆုံး စိုက်ပျိုးထုတ်လုပ်လျက်ရှိသော တိုင်းဒေသကြီး တစ်ခုဖြစ်ပြီး လယ်ယာကဏ္ဍအတွက် သုံးစွဲရန်လိုအပ်သော စက်ကိရိယာများကို ပြည်ပမှ မှာယူတင် သွင်းခြင်းထက် ပြည်ပအသုံးစရိတ်လျှော့ချရေးပြည်တွင်းထွက်ကုန်များကို အစားထိုးသုံးစွဲရန် ပုသိမ်မြို့ စက်မှုဇုန်မှ လယ်ယာသုံးစက်ကိရိယာထုတ်လုပ်၍ ဒေသအာဏာပိုင် ၊ စိုက်ပျိုးရေးဦးစီးဌာန ၊ စက်မှု လယ်ယာဦးစီးဌာနနှင့် စက်မှုဇုန်လုပ်ငန်းရှင်များပေါင်းစပ်၍ တိုင်းအတွင်းရှိ တောင်သူများကို လယ်ယာ သုံးစက်ကိရိယာများ ထုတ်လုပ်ရောင်းချလျက်ရှိကြောင်း သိရသည်။

       ပြည်တွင်းစက်မှုဇုန်များမှ ပြုလုပ်သော လယ်ယာသုံးစက်ကိရိယာများမှာ မျိုးစေ့ချကိရိယာ Drum Seeder ၊ ရေတင်ပိုက် ၊ ရေတင်စက် ၊ စပါးခြွေလှေ့စက် ၊ အင်ဂျင်ပါလက်စွဲကောက်စိုက်စက် စသည့်တို့ကို ထုတ်လုပ်ရောင်းချလျက်ရှိကြောင်း သိရသည်။

      မျိုးစေ့ချကိရိယာ Drum Seeder သည် လူဖြင့်ဆွဲပြီး မျိုးစေ့များကို အတန်းလိုက်ညီညာစွာ ချထားပေးသောကိရိယာဖြစ်၍ ရွံထဲတွင်လှိမ့်သွားနိုင်မှာဖြစ်ပြီး အချင်း (၂၄) လက်မခွဲခန့်ရှိသော Fiber glass ဖြင့် ပြုလုပ်ထားသောကြောင့် ပေါ့ပါးခိုင်ခံပြီး ကြာရှည်ခံသည့်အပြင် ပြုပြင်ထိန်းသိမ်းရလွယ်ကူ ၍ အပိုပစ္စည်းဝယ်ယူရာတွင်လည်း လွယ်ကူကြောင်း ၊ မျိုးစေ့ချကိရိယာအသုံးပြုရာတွင် လူ တစ်ယောက်သာ လိုအပ်သည့်အတွက် လုပ်သားလိုအပ်ချက်ကို လျော့နည်းစေကြီး ဗီယက်နမ်နိုင်ငံ၏ စနစ်ဖြစ်သော လွယ်ကူရိုးရှင်းသော တိုက်ရိုက်မျိုးစေ့ချစနစ်ဖြစ်ကြောင်း သိရသည်။

DOCA (ဧရာဝတီ)

        ဧရာဝတီတိုင်းဒေသကြီး၊ ပုသိမ်ခရိုင်၊ ပုသိမ်မြို့ ပန်းဈေးကွက်တွင် နှင်းဆီပန်း၊ ဂန္ဓာမာပန်း၊ သပြေပန်း၊ အာဆီယံသပြေ၊ ပန်းထိမ်ငို၊ မေမြို့ပန်း စသည်တို့ စိုက်ပျိုးရောင်းချလျက်ရှိကြောင်း သိရသည်။

            ပုသိမ်မြို့ ပန်းဈေးကွက်၌ ၂၀၂၅ခုနှစ်၊ ဩဂုတ်လ တတိယပတ်အတွင်း ဖြစ်ပေါ်နေသော ဂန္ဓာမာပန်း ဈေးနှုန်းအနေဖြင့် (၃/၅) ပင်ပါ တစ်စီးလျှင် (၃၀၀၀)ကျပ် ဖြင့်လည်းကောင်း၊ ပန်းထိမ်ငိုပန်း (၁၀)ပင်ပါ တစ်စီးလျှင် (၅၀၀၀) ကျပ်တို့ဖြင့် အရောင်းအဝယ်ဖြစ်လျက်ရှိကြောင်း၊ ပန်းထိမ်ငိုပန်းသည် တာရှည်အထားခံသည့်အပြင် လှပသည့်အသွင်သဏ္ဌာန်ကြောင့် လူကြိုက်များ ကာ အရောင်းသွက်လျက်ရှိကြောင်း ပန်းရောင်းချသူများထံမှ သိရှိရပါသည်။

DOCA (ဧရာဝတီ)

          ကန့်ဘလူမြို့၊ မြို့မဈေးအတွင်းတွင် ဘုရားပန်းမျိုးစုံဖြစ်သည့် သပြေပန်း၊ နှင်းပန်း၊ ဂန္ဓမာပန်း၊ ဇွန်ပန်း၊ စံပယ်ပန်း၊ စကားဝါပန်း၊ စကားဖြူပန်း၊ ရွှေပန်း၊ ငွေပန်း၊ ပန်းတိမ်ငိုပန်း၊ နှင်းဆီပန်း၊ ဇော်စိမ်းပန်း(ခေါ်)ကျောက်စိမ်းပန်းများ ရောင်းချလျက်ရှိရာ လူကြိုက်များသော နှင်းဆီပန်းများနှင့် ဇော်စိမ်းပန်း(ခေါ်)ကျောက်စိမ်းပန်းများကို ကန့်ဘလူမြို့ပေါ်နှင့် ဒေသအနီးတစ် ဝိုက်ရှိကျေးရွာများမှ တစ်နိုင်တစ်ပိုင်စိုက်ပျိုး ရောင်းချလျက်ရှိသလို နှင်းဆီပန်းများကို ပြင်ဦးလွင်မြို့ မှလည်း မှာယူရောင်းချလျက်ရှိကြောင်း သိရှိရပါသည်။ လူကြိုက်များသော နှင်းဆီပန်းများမှာ ဘုရားပန်းအတွက် သာမက လက်ဆောင်ပေးရာ၌လည်း အဓိကထားအသုံးပြုကြကြောင်း၊ ၂၀၂၅ ခုနှစ်၊ ဩဂုတ်လ တတိယပတ်အတွင်း နှင်းဆီပန်းအကြီး(၁)ပွင့်လျှင် (၇၀၀)ကျပ်၊ အသေး(၁)ပွင့် လျှင် (၅၀၀)ကျပ်နှင့် ဇော်စိမ်းပန်း(ခေါ်)ကျောက်စိမ်းပန်း(၁)ခက်လျှင် (၅၀၀)ကျပ်ဖြင့်ရောင်းချလျက်ရှိကြောင်း ဘုရားပန်းမျိုးစုံရောင်းဝယ်ရေး လုပ်ငန်းရှင်ထံမှ သိရှိရပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ရှိ မြို့မဈေးတွင် ရာသီပေါ်သီးနှံများ၊ အသားမျိုးစုံနှင့် ဒေသထွက်ငါးမျိုးစုံအပြင် ငါးကိုအချဉ်သိပ်၍ ငါးချဉ်အဖြစ်ရောင်းချလျက်ရှိကြောင်း သိရသည်။ ငါးချဉ်ပြုလုပ်ရာတွင် ငါးကြင်းချဉ်နှင့် ငါးသေးချဉ်စသည်ဖြင့် အမျိုးမျိုးပြုရောင်းချလျက်ရှိရာကုန်ကြမ်းများဖြစ်သော ငါးကြင်းနှင့် ငါးအသေးကောင်လေးများကို ကန့်ဘလူမြို့နှင့် ကျွန်းလှ မြို့နယ်မှ ဝင်ရောက်လျက်ရှိကြောင်း သိရှိရပါသည်။

          ၂၀၂၅ခုနှစ်၊ ဩဂုတ်လ တတိယပတ်အတွင်း ရောင်းချလျက်ရှိသော ငါးကြင်းချဉ်(၁)ပိဿာ လျှင်(၃၉၀၀၀)ကျပ်၊ (၅၀)ကျပ်သားလျှင် (၂၀၀၀၀)ကျပ်၊ (၁၀)ကျပ်သားလျှင် (၄၀၀၀)ကျပ်၊ ငါးသေး ချဉ်(၁)ပိဿာလျှင် (၂၄၀၀၀)ကျပ်၊ (၅၀)ကျပ်သားလျှင် (၁၂၅၀၀)ကျပ်၊ (၁၀)ကျပ်သားလျှင် (၂၅၀၀) ကျပ်ဖြင့် အရောင်းအဝယ်ဖြစ်လျက်ရှိကြောင်း ငါးချဉ်များကို ချက်၍လည်းကောင်း၊ အစိမ်းအတိုင်း သုပ်စား၍လည်းကောင်း စားသုံးကြသဖြင့် အရောင်းအဝယ်သွက်လျက်ရှိကြောင်း  ငါးချဉ်ရောင်းဝယ် ရေးလုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)