ပြည်တွင်းကုန်သွယ်မှုသတင်း

        ကုန်ဈေးနှုန်းများမြင့်တက်လာသည်နှင့်အမျှ ပုသိမ်မြို့နယ်အတွင်းတွင် ကြက်သားဈေးနှုန်းမှာလည်း မြင့်တက်လျက်ရှိကြောင်း စားသုံးသူပြည်သူများထံမှသိရှိရပါသည်။ ကြက်သားတစ်ပိဿာဈေးနှုန်းမှာ မွေးမြူရေးကြက်အရှင်ဈေး (၁၃၀၀၀)ကျပ်ခန့်၊ အသားဈေးနှုန်း (၂၀၀၀၀)ကျပ်ခန့်အထိမြင့်တက်နေပြီး ဗမာကြက်အရှင်ဈေး (၂၂၀၀၀)ကျပ်ခန့်၊ အသားဈေးနှုန်းမှာ (၃၀၀၀၀)ကျပ်ခန့်ထိရှိကြောင်းသိရှိရပါသည်။ မေးမြန်းချက်အရ ကြက်သားဈေးနှုန်းမြင့်တက်မှုမှာ ကြက်စာဝယ်ယူရာတွင် သယ်ယူခမြင့်တက်မှုကြောင့် ကြက်စာဈေးနှုန်းကြီးမြင့်မှုအပေါ်မူတည်၍ ကြက်သားဈေးနှုန်းမှာလည်းမြင့်တက်နေကြောင်းသိရှိရပါသည်။

DOCA(ဧရာဝတီ)

         ပဲခူးတိုင်းဒေသကြီး၊ နတ်တလင်းခရိုင်၊ ပေါင်းတည်မြို့တွင် ၂၀၂၄ခုနှစ်၊ နိုဝင်ဘာလတွင် ပေါင်းတည်မြို့၊ စားသုံးသူရေးရာဦးစီးဌာနမှ ဝန်ထမ်းများသည် ပေါင်းတည်မြို့၊ နတ်ပုတီးကျေးရွာမှ တောင်သူတစ်ဦးနှင့်သွားရောက်တွေ့ဆုံပြီး ငရုတ်သီးစိမ်းစိုက်ပျိုးမှုကိုမေးမြန်းခဲ့ပါသည်။

         ထိုသို့သွားရောက်တွေ့ဆုံရာတွင် ငရုတ်စိုက်ပျိုးသူတောင်သူများအနေဖြင့် ငရုတ်တစ်ဧကစိုက်ပျိုးရာတွင် အပင်ရေ(၁၆၀၀၀)ခန့်စိုက်ပျိုးရကြောင်း၊ ကိုယ်တိုင်မျိုးကြဲစိုက်ပျိုးခြင်းဖြစ်ကြောင်း၊ စတင်စိုက်ပျိုးသည့်အချိန်မှစ၍ ငရုတ်ခူးဆွတ်ပြီးသည်အထိ စုစုပေါင်းကုန်ကျစရိတ် (၁၇၀၀၀၀၀) ကျပ်ခန့်ရှိပြီး ငရုတ်စတင်ထွက်ရှိသည့်အချိန်မှစ၍ တစ်ပါတ်တစ်ခါ ခူးဆွတ်ရပြီး အနည်းဆုံးကာလ ဆယ်ပတ်ခန့်အထိခူးဆွတ်ရကြောင်း၊ တစ်ဧကတွင် ငရုတ်ကောင်းလျှင် ပိဿာ(၁၀၀၀)ခန့်ထွက်ရှိပြီး အလယ်အလတ်ထွက်လျှင် ပိဿာ(၆၀၀)ခန့်ထွက်ရှိကြောင်း၊ ငရုတ်ဈေးမှာ တစ်ပိဿာလျှင် (၆၀၀၀)ကျပ်မှ (၆၅၀၀)ကျပ်နှုန်းတို့ဖြင့်ရောင်းချရပြီး ငရုတ်သီးဈေးကောင်းလျက်ရှိကြောင်း ထွက်ရှိလာသောငရုတ်သီးကို ဝက်ပုတ်မြို့ကုန်စည်ဒိုင်နှင့် ပေါင်းတည်မြို့ကုန်စည်ဒိုင်များသို့ပို့ရပြီး ထိုမှတစ်ဆင့် ရန်ကုန်၊ မကွေး၊ ဧရာဝတီတိုင်းများသို့ တင်ပို့လျက်ရှိကြောင်းသိရှိရပါသည်။

DOCA(ပဲခူး)                                                                         

          နတ်တလင်းခရိုင်၊ နတ်တလင်းမြို့နယ်အတွင်းရှိ ကျောင်းကြီးကျေးရွာ၊ အုတ်တွင်းကုန်းကျေးရွာ၊ သရက်တပင်ကျေးရွာ၊ ဝဲကြီးကျေးရွာနှင့် အခြားကျေးရွာများတွင် ပန်းဂေါ်ဖီများကို တစ်နိုင်တစ်ပိုင်စိုက်ပျိုးကြပါသည်။

          ပန်းဂေါ်ဖီစိုက်ပျိူးရန် ပျိုးပင်တစ်ပင်ကို (၇၀)ကျပ်နှုန်းဖြင့် (၀.၂၅)ဧကလျှင် ပျိုးပင်(၃၅၀၀) ခန့်စိုက်ပျိုးရပါသည်။ မြေကျင်းကလေးများတူးပြီး ပျိုးပင်တစ်ပင်ကို ပင်ခြားတန်းခြား နှစ်ပေခွဲထား၍ စိုက်ပျိုးကြပါသည်။ ပန်းဂေါ်ဖီကို စက်တင်ဘာလ နောက်ဆုံးပတ်မှစတင်စိုက်ပျိုးပြီး တစ်လခွဲခန့်အကြာတွင် စတင်ခုတ်ယူရောင်းချပါသည်။ ပန်းဂေါ်ဖီ(၀.၂၅)ဧကစိုက်ပျိုးရာတွင် ကုန်ကျစရိတ်အနေဖြင့် ပျိုးပင်၊ ထွန်ယက်ခ၊ စိုက်ပျိုးခ၊ ရေသွင်းခ၊  ပေါင်းမြတ်ရှင်းခ၊ ဓာတ်မြေဩဇာနှင့် ပိုးသတ်ဆေးအပါအဝင် စုစုပေါင်း(၇၀၀၀၀၀)  ကျပ်ကုန်ကျကြောင်း၊ အထွက်နှုန်းမှာ  အပွင့်ရေ (၃၂၀၀)ခန့်ထွက်ရှိပြီး ယခုအောက်တိုဘာလ တတိယပတ်တွင် ပန်ဂေါ်ဖီတစ်ပွင့်လျှင် အရွယ်အစားကိုလိုက်၍ (၉၀၀-၇၀၀-၅၀၀) ကျပ်နှုန်းဖြင့်ရောင်းချရပြီး ဒေသအတွင်းသာမက ကုန်စိမ်းဒိုင်များမှတစ်ဆင့် အခြားမြို့နယ်များသို့ပါ တင်ပို့ရောင်းချလျက်ရှိကြောင်း  ပန်းဂေါ်ဖီစိုက်တောင်သူတစ်ဦးထံမှသိရပါသည်။

DOCA(ပဲခူး)                                                                         

      ၂၀၂၄ ခုနှစ်၊ နိုဝင်ဘာလအတွင်း ဧရာဝတီတိုင်းဒေသကြီး၊ ပုသိမ်မြို့နယ်အတွင်း ကြက်သွန်ဖြူ ဈေးနှုန်းအနည်းငယ်မြှင့်လျက်ရှိပြီး ဈေးနှုန်းများအနေဖြင့် ယခင်လက ကြက်သွန်ဖြူလက္ကားဈေးနှုန်း တစ်ပိဿာလျှင် ( ၁၇၀၀) ကျပ်နှင့် လက်လီဈေးနှုန်း တစ်ပိဿာလျှင် (၁၈၀၀) ကျပ်ဖြစ်ပြီး ယခုအခါ ကြက်သွန်ဖြူ လက္ကားဈေးနှုန်း တစ်ပိဿာလျှင် (၂၁၀၀) ကျပ်နှင့် လက်လီဈေးနှုန်း တစ်ပိဿာလျှင် (၂၂၀၀) ကျပ်တို့ဖြစ် အရောင်းအဝယ် ဖြစ်လျက်ရှိကြောင်း  သိရပါသည်။

     ပုသိမ်မြို့နယ်အတွင်း ဖြစ်ပေါ်နေသော အောက်တိုဘာလ တတိယပတ်နှင့် နိုဝင်ဘာလ တတိယပတ် ဈေးနှုန်းနှိုင်းယှဉ်ခြင်းအားဖြင့် ပုသိမ်မြို့နယ်အတွင်း ကြက်သွန်ဖြူ ဈေးနှုန်းအနည်းငယ်မြင့်တက်လျက်ရှိကြောင်း သိရပါသည်။   

DOCA(ဧရာဝတီ)

       ပဲခူးတိုင်းဒေသကြီး၊ ညောင်လေးပင်ခရိုင်၊ ညောင်လေးပင် မြို့မဈေးရှိ ကုန်စိမ်းအရောင်းတန်း၊ သီးနှံဆိုင်များတွင် လိမ္မော်သီးများလှိုင်လှိုင်ပေါ်၍ သီးနှံဈေးသည်များတွင်သာမက လမ်းဘေးတွင် ခင်းကျင်း၍လည်း လိမ္မော်သီးများ ရောင်းချနေသည်ကိုတွေ့ရပါသည်။

          လိမ္မော်သီးသည် ကျန်းမာရေးအတွက် အကျိုးပြုသောသီးနှံတစ်မျိုးဖြစ်ပါသည်။ လိမ္မော်သီးတွင် ကယ်လိုရီ (၈၀)မီလီဂရမ်၊ ပိုတလ်စီရမ် (၂၅၀)မီလီဂရမ်၊ ကာဗိုလ်ဟိုက်ရိတ်(၁၉)ဂရမ်၊ ပရိုတင်း (၁)ဂရမ်ပါရှိပြီး အဆီဓာတ်မပါရှိသောအသီးဖြစ်ပြီး ထိုဓာတ်လေးမျိုးလုံးသည် အရေးပါသောဓာတ်များဖြစ်ပါသည်။ လိမ္မော်သီးစားသုံးပေးခြင်းဖြင့်  ကိုယ်ခံအားကောင်းစေခြင်း၊ အရိုးကိုသန်မာစေခြင်း၊ အမြင်အာရုံကောင်းမွန်စေခြင်း၊ သွေးတွင်းအဆီဓာတ်ကိုကျဆင်းစေခြင်း၊ မောပန်းမှုကိုပြေပြောက်စေခြင်း ၊ အစာအိမ်အူလမ်းကြောင်းကိုအထောက်ကူပြုစေခြင်း စသည့် အကျိုးများစွာရရှိစေပါသည်။ အထူးသဖြင့် ကလေးငယ်များစားသုံးသင့်ပါသည်။ ကလေးငယ်များစားသုံးပေးခြင်းကြောင့် ကလေးငယ်များတွင် ဉာဏ်ရည်မြင့်မားခြင်း၊ အရပ်ရှည်ခြင်း၊ ကိုယ်ခန္ဓာဖွံ့ဖြိုးမှုမြန်ဆန်ခြင်း စသည့် အကျိုးကျေးဇူးများရရှိနိုင်ပါသည်။ သွေးတွင်းသကြားဓာတ်များသော ဆီးချိုရှိသူများ စားသုံးနိုင်ပါသည်။ ဆီးချိုရှိသူများ လိမ္မော်သီးများစားသုံးခြင်းသည် ဆီးချိုကိုမတက်စေဘဲ အမောပြေလန်းဆန်းစေပြီး သွေးတွင်းသကြားဓာတ်ကိုထိန်းညှိပေးပါသည်။ အသက်အရွယ်ကြီးရင့်သူများလည်း စားသုံးပေးခြင်းဖြင့် ကိုယ်ခန္ဓာကိုယ်ကို ကျန်းမာလန်းဆန်းစေပါသည်။ ကားမူးတတ်သူများအနေဖြင့်လည်း အခွံများကိုခွာစားနိုင်သည့်အပြင် အခွံများကိုရှူ၍လည်း အမူးပြေစေပါသည်။

        လိမ္မော်သီးများကို အပြင်အခွံကိုခွာပြီး အမွှာစိတ်အသေးများအတိုင်းစားသုံးနိုင်ပြီး ကြိတ်စက်များဖြင့်ကြိတ်ကာ ပျားရည်ဖြင့် ဖျော်ရည်အဖြစ်လည်းဖျော်သောက်နိုင်ပါသည်။ လိမ္မော်သီးအမွှာစိတ်လေးများကို တခြားသီးနှံများဖြင့်ရောနှောပြီး လူငယ်များအကြိုက် ငရုတ်သီးများ၊ ငါးပိအနည်းငယ်၊ ဆားအနည်းငယ်တို့ဖြင့် သုပ်စားနိုင်ပါသည်။ လိမ္မော်သီးများကို အခွံခွာ အစေ့ထုတ်ပြီး သကြားအနည်းငယ်ဖြင့် ယိုထိုးပြီး မိမိအိမ်ရှိ ရေခဲသေတ္တာများတွင်ထည့်၍ သိမ်းပြီး မိမိစားချင်သည့်အချိန်မှ လိုသလို ထုတ်စားနိုင်ပါသည်။

         ပဲခူးတိုင်းဒေသကြီး၊ ညောင်လေးပင်ခရိုင်၊ ညောင်လေးပင် (မြို့မဈေး)တွင် လိမ္မော်သီးအကြီးတစ်လုံးလျှင် (၁၀၀၀)ကျပ်၊ အသေးတစ်လုံးလျှင် (၅၀၀) ကျပ်မှ (၈၀၀)ကျပ်အတွင်း၊ အခွံနွှာပြီး တစ်ခြားအသီးများနှင့်အရောသုပ်တစ်ပွဲလျှင် (၁၅၀၀)ကျပ်၊ လိမ္မော်ရည်အဆီတစ်ဘူးလျှင်  (၇၀၀၀) ကျပ်နှုန်းဖြင့်ရောင်းချနေကြောင်းသိရှိရပါသည်။

DOCA(ပဲခူး)