ပြည်တွင်းကုန်သွယ်မှုသတင်း

   ပဲခူးတိုင်းဒေသကြီး၊ ပြည်ခရိုင်၊ ပြည်မြို့ပေါ်ရှိ ဈေးများတွင် ပဲပြားများရောင်းချနေကြောင်း သိရသည်။ ပြည်မြို့အတွင်းရှိ ဟင်းသီးဟင်းရွက်ရောင်းချသည့် ဈေးဆိုင်များတွင် ဟင်းသီးဟင်းရွက်အပြင် ပဲပင်ပေါက်နှင့် ပဲပြား သည်လည်း မပါမဖြစ် တွဲ၍ စားသုံးသော အစားအစာတစ်မျိုးဖြစ်ပါသည်။ ပဲပြားသည် သတ်သတ်လွတ်စားသုံးသူများ အတွက် အသားဓါတ်တွေကို ပဲပြားကနေရနိုင်ပြီး ကိုယ်ခန္ဓာအတွက် လိုအပ်တဲ့ ဗီတာမင်ချို့တဲ့မသွားအောင် ပဲပြားကို စားသုံးကြတာဖြစ်ပါတယ်။ ပဲပြားကို ကြော်ပြီး အစာသွပ်စားခြင်းဟာ မြန်မာတို့အတွက် နှစ်ကြိုက်လှတဲ့ သရေစာ တစ်မျိုးဖြစ်ပါသည်။ ပဲပြားကို အစိမ်းချက်စားကြသလို ကြော်ပြီးလည်း ချက်စားကြပါတယ်။ ဒါ့အပြင်  ဟင်းချိုတွေနဲ့ တစ်ချို့ ဟင်းလျာတွေမှာ တွဲဖက်ပါဝင်ပစ္စည်းအဖြစ် အသုံးပြုကြသည်။ ပဲပြားကို ကြော်ပြီးစားသုံးကြသလို သုပ်၍လည်း စားသုံးကြသည်။

    ၂၀၂၅ ခုနှစ်၊ အောက်တိုဘာလ၊ ဒုတိယပတ်တွင် ရောင်းချလျက်ရှိသော ပဲပြားဈေးနှုန်းများမှာ ပဲပြား(၂)တုံးတစ်တွဲလျှင် (၉၀၀)ကျပ်ဖြင့် ရောင်းချပြီး တစ်တုံးလျှင် (၅၀၀)ကျပ်ဖြင့် ရောင်းချကြောင်းသိရသည်။

DOCA(ပဲခူး)

   ပဲခူးတိုင်းဒေသကြီး၊ ပြည်ခရိုင်၊ ပြည်မြို့၊ မြို့သစ်ဈေးတွင် အောက်တိုဘာလ၊ ဒုတိယပတ်တွင် ဖြစ်ပေါ်ခဲ့သော သစ်သီးဝလံဈေးနှုန်းများမှာ ပန်းသီးတစ်လုံးလျှင် (၁၅၀၀)ကျပ်မှ (၂၅၀၀)ကျပ်ထိ၊ ပန်းသစ်တော် (၁)လုံးလျှင် (၃၀၀၀) ကျပ်၊ တောင်ခွေးရဲကျေးရွာမှ ထွက်ရှိသော ငှက်ပျောဖီးကြမ်း တစ်ဖီးလျှင် (၁၅၀၀)ကျပ်မှ (၂၅၀၀)ကျပ်အထိ၊ သီးမွှေး ငှက်ပျောသီး တစ်ဖီးလျှင် (၂၅၀၀)ကျပ်မှ (၅၀၀၀)ကျပ်အထိ မာလကာသီးတစ်လုံးလျှင် (၃၀၀)ကျပ်မှ (၅၀၀)ကျပ်ထိ၊ နဂါးမောက်သီး တစ်လုံးလျှင် (၁၀၀၀)ကျပ်မှ (၂၅၀၀)ကျပ်ထိ၊ လိမ္မော်သီးတစ်လုံးလျှင် (၃၅၀၀)ကျပ်၊ စပျစ်သီး အစေ့လွတ် (၁၀)ကျပ်သားလျှင် (၇၀၀၀)ကျပ်၊ ဖရဲသီးတစ်လုံးလျှင် (၅၀၀၀-၇၀၀၀)ကျပ်၊ မော်လမြိုင်ကျွဲကောသီး တစ်လုံးလျှင် (၃၀၀၀)ကျပ်ထိ အသီးသီးအရောင်းအဝယ်ဖြစ်နေကြောင်း၊ ပြည်မြို့၊ မြို့သစ်ဈေးအတွင်း ရောင်းချ နေသော အသီးဆိုင်မှ သတင်းရရှိပါသည်။

DOCA(ပဲခူး)

     ရာသီစာဖြစ်သည့် တနင်္သာရီတိုင်းဒေသကြီး၊ ထားဝယ်ဒေသထွက် ပိန်းဥကို ထားဝယ်မြို့အနီးတစ်ဝိုက်ရှိ ကျေးရွာများမှ ထားဝယ်မြို့ပေါ်ဈေးများသို့ လာရောက်ရောင်းချကြပါသည်။ ဒေသခံ ပိန်းဥ စိုက်သူများသည်  အပိုဝင်ငွေရရှိရန်အတွက် မိမိတို့၏အိမ်ခြံဝန်းအတွင်း တစ်နိုင်တစ်ပိုင် စိုက်ပျိုးကြသည့်အပြင် စီးပွားဖြစ်လည်းစိုက်ပျိုးကြသည်။  

       ၂၀၂၅ခုနှစ်၊ အောက်တိုဘာလအတွင်း ပိန်းဥဈေးနှုန်းမှာ အရွယ်အစားအလိုက် တစ်ပိဿာလျှင် (၅၀၀၀)ကျပ်နှင့် အသင့်စားပိန်းဥဈေးနှုန်းမှာ တစ်ပိဿာလျှင်(၈၀၀၀)ကျပ်နှုန်းတို့ဖြင့် ထားဝယ်မြို့ပေါ်ရှိ ဈေးများတွင် ရောင်းချလျက်ရှိကြောင်း သိရသည်။

DOCA (တနင်္သာရီ)

    တနင်္သာရီတိုင်းဒေသကြီး၊ ထားဝယ်ခရိုင်၊ ထားဝယ်မြို့နယ်တွင် သံပုရာသီးနှင့် ရှောက်သီး များစိုက်ပျိုးထားပြီး ယခုအချိန်တွင် လှိုင်လှိုင်ထွက်ပေါ်နေပြီဖြစ်ကြောင်းသိရပါသည်။ သံပုရာသီး နှင့်ရှောက်သီးများကို နေရာတော်တော်များများတွင် အသုံးပြုကြသဖြင့် သုံးစွဲမှုများသည့် သီးနှံများ ဖြစ်ကြောင်း သိရသည်။

     ၂၀၂၅ခုနှစ်၊ အောက်တိုဘာလ အတွင်းဖြစ်ပေါ်လျက်ရှိသော သံပုရာသီးဈေးနှုန်းများမှာ သံပုရာ သီး(အကြီး)(၁)လုံးလျှင် (၄၀၀/၅၀၀)ကျပ်၊ (အသေး)(၁)လုံးလျှင်(၂၅၀/၃၀၀)ကျပ်ဖြင့်လည်းကောင်း၊ ရှောက်သီး (အကြီး)(၁)လုံးလျှင် (၈၀၀)ကျပ်၊ (အသေး)(၁)လုံးလျှင် (၅၀၀)ကျပ်ဖြင့် အရောင်းအဝယ် ဖြစ်လျက် ရှိပြီး ယခုအခါ စည်ပင်သာယာဈေးတွင် အသီးအရွယ်အစားအလိုက် ဈေးနှုန်းအနည်းငယ် ကွာခြားမှု ရှိကြောင်း ကုန်စိမ်းရောင်းချသူထံမှ သိရပါသည်။

DOCA (တနင်္သာရီ)

   ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်တွင် စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းများဆောင်ရွက်လျက်ရှိသလို စားသုံးသူများနေ့စဉ် ဝယ်ယူသုံးစွဲလျက်ရှိသည့် အခြေခံစားကုန်ဈေးနှုန်းများ အသားဈေးနှင့် ငါးဈေးနှုန်းများကို စာရင်းကောက်ယူပြုစု၍ အထက်အဆင့်ဆင့်သို့ တင်ပြဆောင်ရွက်လျက်ရှိကြောင်းသိရသည်။

          ၂၀၂၅ ခုနှစ်၊ အောက်တိုဘာလ၊ ဒုတိယပတ်တွင် ရောင်းချနေသော ငါးသလောက်(၁၀)ကျပ်သားလျှင် (၄၀၀၀)ကျပ်၊ ငါးကြင်းဖြူ (၁၀)ကျပ်သာလျှင် (၁၈၀၀)ကျပ်၊ ငါးသလဲထိုး (၁၀)ကျပ် သားလျှင် (၄၀၀၀)ကျပ်၊ ငါးစရစ် (၁၀)ကျပ်သားလျှင် (၂၀၀၀)ကျပ်၊ ငါးခူဈေးနှုန်းများမှာ (၁၀)ကျပ်သားလျှင် (၂၀၀၀)ကျပ်၊ လယ်ကြားငါးခူများမှာ (၁၀)ကျပ်သာလျှင် (၃၀၀၀-၄၀၀၀) ကျပ်၊ ပုဇွန်ဈေးနှုန်းများမှာ ပုဇွန်ကြားနှင့် ရေချိုပုဇွန်ထုပ်မှာ(၁၀)ကျပ်သားလျှင် (၄၅၀၀-၆၅၀၀)ကျပ် ပုဇွန်စိတ်ဈေးနှုန်းများမှာ (၁၀)ကျပ်သားလျှင် (၂၀၀၀)ကျပ်တို့ဖြင့် အရောင်းအဝယ်ဖြစ်လျှက် ရှိကြောင်း ငါးရောင်းချသူ တစ်ဦးထံမှ သိရသည်။

DOCA(ပဲခူး)