သတင်းနှင့် လှုပ်ရှားမှုများ

    မကွေးတိုင်းဒေသကြီး၊ မကွေးခရိုင်၊ နတ်မောက်မြို့၌ (၁၆-၁၀-၂၀၂၃)ရက်နေ့၊ နံနက်(၀၉:၀၀)နာရီအချိန်တွင် နတ်မောက်မြို့၊ မြို့မစျေး၊ စျေးရပ်ကွက်၊ ရန်အောင်မြင်ရပ်ကွက်တို့၌ ရောင်းချလျက်ရှိသော မုန့်မျိုးစုံဆိုင်များသို့သွားရောက်၍ ကွင်းဆင်းစစ်ဆေးဆောင်ရွက်ခဲ့ကြပါသည်။

   အဆိုပါကွင်းဆင်းစစ်ဆေးရာတွင် စားသုံးသူပြည်သူများဘေးဥပဒ်ကင်းရှင်းစွာသုံးစွဲနိုင်ရေး၊ သတင်းအချက်အလက်များပြည့်စုံမှန်ကန်စွာဖော်ပြထားသော ကုန်စည်များကိုသာဝယ်ယူသုံးစွဲနိုင်စေရေးအတွက်ရည်ရွယ်၍ ဆောင်ရွက်ခဲ့ကြပြီး အစားအသောက်နှင့်ဆေးဝါးကွပ်ကဲရေးဦးစီးဌာန (FDA)မှ စားသုံးရန်မသင့်ဟုထုတ်ပြန်ထားသော အစားအသောက်များကိုလည်းစစ်ဆေးခဲ့ကြောင်း၊ ကွင်းဆင်းစစ်ဆေးခြင်းကို အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့၊ မြို့နယ်စည်ပင်သာယာရေးအဖွဲ့၊ မြို့နယ်မီးသတ်တပ်ဖွဲ့၊ မြို့နယ်ကျန်းမာရေးဦးစီးဌာန၊ မြို့နယ်စားသုံးသူရေးရာဦးစီးဌာနတာဝန်ခံတို့ပါဝင်သော ပူးပေါင်းအဖွဲ့ဖြင့် စစ်ဆေးခဲ့ကြောင်းသိရသည်။

      ထိုသို့ ကွင်းဆင်းစစ်ဆေးရာတွင် မုန့်မျိုးစုံရောင်းချသော စျေးဆိုင်(၈)ဆိုင်အား စစ်ဆေးခဲ့ပြီးနောက် မြို့မစျေးတွင်ရောင်းချသော စျေးဆိုင်(၂)ဆိုင်တွင်လည်း (FDA)မှ စားသုံးရန်မသင့်ဟုထုတ်ပြန်ထားသော လျှာရင်းမြက်အမှတ်တံဆိပ် (ဆီးစပ်လုံး)များအားတွေ့ရှိခဲ့ရပြီး (၁)ထုပ်လျှင် ကျပ်(၁၀၀)ဖြင့်ရောင်းချလျက်ရှိ၍ အထုပ်ရေ (၃၀၅)ထုတ်၊ စုစုပေါင်းတန်ဖိုးငွေ ကျပ်(၃၀၅၀၀)အား အဖွဲ့စုံရှေ့တွင် မြေမြှုပ်ဖျက်ဆီးခဲ့ကြောင်းသိရှိရပါသည်။

DOCA(မကွေး)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်ဦးစီးမှူးရုံးမှ ဝန်ထမ်းများသည် အထက်ဌာနအကြီးအကဲများ၏ လမ်းညွှန်မှုဖြစ်သော Green Office & Clean Office ဖြစ်စေရေးအတွက် အပတ်စဉ် သောကြာနေ့တိုင်း မိမိရုံးပတ်ဝန်းကျင်သန့်ရှင်းသာယာလှပရေး/ စိမ်းလန်းစိုပြေရေး ရုံးတွင်း/ ရုံးပြင်သန့်ရှင်းရေးနှင့် ပန်းအလှပင်များ၊ သီးပင်စားပင်များ စိုက်ပျိုးပြုစုခြင်းတို့ဆောင်ရွက်လျက်ရှိပါသည်။

     ထိုသို့ စိုက်ပျိုးရာတွင် နှစ်ရှည်စားပင်များဖြစ်သော ကြောင်လျှာပင်၊ ဒန့်ဒလွန်ပင်၊ သရက်ပင်၊ မာလကာပင်များ၊ ရာသီသီးနှံများဖြစ်သော ဘူးပင်၊ ချဉ်ပေါင်ပင်၊ သင်္ဘောပင်၊ ကန်စွန်းပင်၊ ငရုတ်နှင့် ပင်စိမ်းပင်တို့အား ဝန်ထမ်းများစုပေါင်း၍ စိုက်ပျိုးခဲ့ကြပါသည်။

    မကွေးခရိုင်ဦးစီးမှူးရုံးအရှေ့ ဝရန်တာ၌ မျက်စိပသာဒဖြစ်စေရန် စိုက်ပျိုးထားသောပန်းအလှပင်များမှာ ကတ္တီပါရွက်လှ (Coleus)၊ လဝန်းဂမုန်း (Plantain Lilier)၊ ကျောက်စိမ်းဂမုန်း  (Zamioculcar Zamiiolia)၊ ဂန္တရားနှင်းဆီ (Aelemium Obesum)၊ ဂျပန်စပယ် (Arabian Jasmine)၊ ရွက်လှ (Garden Crotan)၊ ယုဇန (Java Cola)၊ ရှင်သီဝလိ (Spathiphyllam Wallisii)၊ စီးပွားဂမုန်း (Chinese Evergreen)၊ တောထန်း (Livistona)၊ နွယ်လိမ်ဂမုန်း (Spider Plant)၊ အနက်ဆင်ဂမုန်း (Pin- Stripe Calathea)၊ နဂါးဆက်ဂမုန်း (Dracaena Thifasciata Snake Plant) နှင့် အိမ်တော်မင်္ဂလာ (Aglaonema Crete) ပင်တို့ဖြစ်ကြပြီး ရုံးဝန်းမြောက်ဘက်ရှိ မြေလွတ်နေရာများ၌ ဝန်ထမ်းများစုပေါင်း၍ သီးပင်စားပင်များစိုက်ပျိုးခြင်းဖြင့် ဝန်ထမ်းများစုပေါင်းလုပ်ကိုင်လိုစိတ် (Team Work) ဖြစ်စေခြင်း၊ ထွက်ရှိလာသောအသီးအရွက်တို့ကို အလွယ်တကူခူးဆွတ်စားနိုင်ပြီး ကုန်စျေးနှုန်းကြီးမြင့်မှုအပေါ် နေ့စဉ် စားသောက်စရိတ်အတွက် စျေးဖိုးကာမိသည့်အပြင် မိမိတို့စိုက်ပျိုးသည့်အပင်များမှ လတ်လတ်ဆတ်ဆတ်ခူးစားရသောကြောင့် ပိုးသတ်ဆေးအန္တရာယ်ကင်းရှင်းခြင်း၊ ကျန်းမာခြင်း၊ ဝန်ထမ်းသက်သာထောက်ပံ့ရေးအတွက်လည်း အထောက်အကူပြုနိုင်မည်ဖြစ်ကြောင်း ရေးသားတင်ပြလိုက်ရပါသည်။

DOCA(မကွေး)

      စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ စစ်ဆေးရေးမှူး ဦးကျော်မိုးလွင်သည် ၂၀.၁၀.၂၀၂၃ ရက်နေ့တွင် မိုးညှင်းမြို့၊ စိမ်းတောင်ရပ်ကွက်အတွင်းရှိ ဒေါ်ချိုမာ (ကုန်စုံဆိုင်)သို့ ကုန်အညွှန်းအမှတ်အသားဖော်ပြခြင်းနှင့် ပတ်သက်ပြီး စားသုံးသူကာကွယ်ရေးဥပဒေပါ ပြဌာန်းချက် များနှင့် ကိုက်ညီခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

      ထိုသို့ ဈေးကွက်စောင့်ကြည့် စစ်ဆေးခဲ့ရာ ဝိုင်းဝိုင်းလည် (ကြက်ဥမရွေး) အမှတ်တံဆိပ်ပါ အသင့်စားမုန့် အမျိုးမျိုးတို့တွင် ကုန်စည်အမျိုးအစားအလိုက် သတ်မှတ်ချက်များနှင့်အညီ မြန်မာ ဘာသာဖြင့် ပြည့်စုံစွာ ဖော်ပြရမည့် ကုန်စည်၏ အမျိုးအမည်၊ အရွယ်အစား၊ အရေအတွက် အသားတင် ပမာဏ၊ ထားသိုသိမ်းဆည်းမှုအညွှန်းနှင့် ဓာတ်မတည့်ကြောင်းဖော်ပြချက်တို့ကို မဖြစ်မနေ ကုန်အညွှန်းအမှတ်အသား ဖော်ပြထားရှိခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ရာ ကုန်အညွှန်း အမှတ်အသားပြည့်စုံစွာ ဖော်ပြထားရှိကြောင်း စစ်ဆေးတွေ့ရှိရပြီး ကုန်စုံဆိုင်ပိုင်ရှင်အား ကုန်အညွှန်း အမှတ်အသား ပြည့်စုံမှန်ကန်မှုမရှိသော ကုန်စည်များကို မရောင်းချရန် အသိပညာပေး ဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ကြောင်းသိရပါသည်။

DOCA(ကချင်)

          ဧရာဝတီတိုင်းဒေသကြီး၊ဖျာပုံခရိုင်၊ကျိုက်လတ်မြို့နယ်စားသုံးသူရေးရာဦးစီးဌာနမှမြို့နယ်တာဝန်ခံနှင့် ဝန်ထမ်းများသည်(၁၇-၁၀-၂၀၂၃)ရက်နေ့နံနက်(၁၀:၀၀)နာရီအချိန်တွင် ကျိုက်လတ်မြို့နယ် (၆)ရပ်ကွက်ရှိ အမှတ်(၁၀)မူလွန်ကျောင်း၌ ကျောင်းဆရာ/ဆရာမ(၁၃)ဦးနှင့်ကျောင်းသား/ကျောင်းသူ (၃၉၂)ဦး စုစုပေါင်း (၄၀၅)ဦးအား စားသုံးသူကာကွယ်ရေးအသိပညာပေးဟောပြောခဲ့ပါသည်။

          အသိပညာပေးဟောပြောရာတွင် မြို့နယ်တာဝန်ခံက ဓါတုဆိုးဆေးနှင့်ပတ်သတ်၍ သိကောင်းစရာများ ကုန်အညွှန်းအမှတ်အသားအား မြန်မာဘာသာဖြင့် ဖော်ပြထားသော မုန့်များအား ဝယ်ယူစားသုံးရန်နှင့် မြန်မာ ဘာသာဖြင့် ကုန်ညွှန်းအမှတ်အသားဖော်ပြထားခြင်းမရှိသော မုန်များအား စားသုံးရန်မသင့်ကြောင်း၊ အသားလုံး၊ အသားပြားဝယ်ယူစားသုံးရာတွင် FDA ၏ ထောက်ခံချက်ပါရှိမှသာ ဝယ်ယူစားသုံးရန်၊ သက်တမ်းလွန် အစားအစာ များအားဝယ်ယူစားသောက်ခြင်းမပြုရန် အသိပညာပေးဟောပြောခဲ့ကြောင်းသိရပါသည်။

DOCA(ဧရာဝတီ)

          ဘိုကလေးမြို့နယ် ၊ စားသုံးသူရေးရာဦးစီးဌာန၊ မြို့နယ်တာဝန်ခံနှင့် ဝန်ထမ်းတို့သည် ၂၀၂၃ခုနှစ်၊ အောက်တိုဘာလ (၁၇) ရက်နေ့ နံနက်(၁၀:၀၀)နာရီအချိန်တွင် ဘိုကလေးမြို့ အမှတ်(၁ ) ရပ်ကွက်ရှိ တစ်ပိုင်တစ်နိုင်မုန့်များ ထုတ်လုပ်ရောင်းချနေသည့် Top Oneမုန့်လုပ်ငန်းသို့ ကွင်းဆင်းစိစစ်ခဲ့ကြပါသည်။

          အဆိုပါ ကွင်းဆင်းစိစစ်ရာတွင် Top One မုန့်လုပ်ငန်းမှ သုံးထောင့်မုန့်၊ အငံ မုန့်များ ထုတ်လုပ် လျက်ရှိကြောင်း၊ သုံးထောင့်မုန့်ထုတ်လုပ်ရာတွင် ပါဝင်ပစ္စည်းများအနေဖြင့် (သကြား၊ဂျုံ၊ ကြက်ဥ၊ ဆီ၊ ရေသန့်) ဖြစ်ပြီး အငံမုန့်ထုတ်လုပ်ရာတွင် ပါဝင်ပစ္စည်းများမှာ (ဂျုံ၊ သကြား၊ မြေပဲ၊ ကြက်သွန်နီကြော်၊ နှမ်း၊ ဆီ၊ ရေသန့်များ ပါဝင်ပြီး အဆိုပါ မုန့်(၂)မျိုး၏  တနေ့ထုတ်လုပ်မှု မှာ ဘူးအရေအတွက်မှာ (၄၅၀) ဘူးခန့် ဖြစ်ကြောင်း၊ ဈေးကွက်အတွင်းရောင်းဝယ်မှု အခြေအနေပေါ်မူတည်၍ နေ့စဉ် ထုတ်လုပ်ရောင်းချလျက်ရှိကြောင်း၊ မုန့်တစ်ဘူးလျှင် သုံးထောင့်မုန့် (၆)ခု ပါရှိပြီး အငံမုန့် အနေဖြင့် (၈)ခုပါဝင်ကြောင်း၊ တစ်ဘူးလျှင် လက်ကားဈေးနှုန်း (၂၁၅၀)ကျပ်ဖြစ်၍ လက်လီဈေးနှုန်းမှာ (၂၃၀၀)ကျပ်ဖြင့် ရောင်းချလျက်ရှိကြောင်း၊ ဈေးကွက် အခြေအနေပေါ်မူတည်၍ ဒေသတွင်းနှင့် ကဒုံ၊ဧရာ၊မော်ကျွန်းဒေသများသို့ ဖြန့်ဖြူး ရောင်းချပေးလျက်ရှိကြောင်းသိရပါသည်။

     ထို့နောက်တာဝန်ခံက ထုတ်လုပ်သည့် ကုန်စည်များနှင့် ပက်သက်၍ စားသုံးသူများ ဘေး အန္တရာယ် ကင်းရှင်းရေး၊ ထုတ်ကုန်လုံခြုံစိတ်ချရမှု ရှိစေရေးနှင့် မြန်မာဘာသာဖြင့် ဖော်ပြထားသော  ကုန်အညွှန်းအမှတ်အသား ဖော်ပြချက်များကိုလည်း ကုန်စည်ထုပ်ပိုးမှုအပေါ်တွင် စနစ်တကျထည့် သွင်းဖော်ပြရန် ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)